石棺藏屍案(十四)
《阿豪的故事》
案情撮要：2016年3月4日至3月29日期間，於荃灣灰窰角街DAN6商業大廈，本案被告曾祥欣(T)、劉錫豪(阿豪)、張善恒(KK)涉嫌謀殺男子張萬里(J)。行兇後以木板製成巨型箱子，放入屍體，再用水泥填封整個箱子，形成石棺。
三名被告企圖將石棺運到偏僻地埋掉或掉進海裡，可惜石棺過重，超出電梯負載量，需折返單位……三人欲鑿開石棺取出屍體方便棄屍，始終失敗，於是把石棺留在單位內，決定帶同知情女子何菱瑜(小草)逃走到台灣……
今早開庭，繼續播放第一被告(T)的警署錄影會面、案件重組片段及辯方大狀盤問拘捕警員。之後，大家所期待的第二被告(阿豪)警署錄影會面，在庭上播放，出現了一個新故事，本文章……我又拼砌圖，重組資料、組織，再說故事……
「阿Sir……係張善恒(第三被告KK)箍住張萬里(死者J)，跟住打針佢就死咗喇……我淨係埋屍咋，我無份隊(殺)死佢……」這是第二被告(阿豪)被拘捕後的第一句話。
回到警署，探員為阿豪做錄影會面。錄影開始，探員問阿豪，對於以上一句說話有甚麼回應？為何會這樣說？阿豪：「阿Sir，我有詳盡補充……2016年3月4號，大約中午，J來到DAN6單位，當時係T同KK帶佢到達單位，三個人一齊入屋。」「當時我瞓緊覺，因為果日我唔舒服，鼻敏感發作，每次一發作我個人就會好累、暈、同集中唔到注意力……」
阿豪接著說：「當時佢哋(T及KK)叫醒我食早餐，買咗個美心叉燒飯比我，我就係枱度食嘢，T就番咗上閣樓，小草係閣樓嘅床度，唔知佢係咪清醒，我分咗啲早餐比佢食……」「KK同J傾緊啲有關錢嘅事，但講緊咩我唔了解。」
早餐過後十五分鐘，由於阿豪很累，就在地下大廳的雙人床褥(Queen Size)上睡著了……
突然，阿豪聽到類似硬物撞向牆的聲音，又聽到掙扎聲，阿豪被吵醒了，阿豪稱：「當時我打開眼，睇唔到梳化果邊發生咩事！」KK大叫：「喂！幫拖啊！」阿豪：「我企起身，嚇一嚇，見到KK係J身後，用雙手經J腋下，從後箍住J，KK右手箍住J既右膊，左手掩住J嘅口，唔比J郁，J有掙扎……」「阿J掙扎果陣，有講：喂！喂！喂！做咩啊！」阿豪受驚後，稱自己清醒多了。
接著，阿豪稱：「跟住KK將J反轉身，用同一動作箍住J，KK推跌J果陣，J撞到我，就失平衡跌落床，而J就面向天，瞓左係我上面壓住我……我撞到個頭(後腦)，暈一暈，見到KK左手箍住J條頸，右手戴住勞工手套，掩住J嘅口鼻，維持兩至三分鐘……我未反應得切，我又郁唔到！」
「跟住見到KK係梳化拎咗條預先沾有哥羅芳嘅白色布(是T預先把哥羅芳沾上白布，然後放在沙發上)，用右手掩住J嘅鼻、嘴，我聽到J發出扯蝦聲……我掙扎，縮開，推開阿J，離開床褥。」這時，阿豪聽到KK大叫：「阿T！搞掂喇！落嚟啦！」KK又吩咐阿豪看管J。阿豪：「由於我受驚嚇中，我用手探下J個鼻，當時佢仲有呼吸……之後我係閣樓攞咗塊圓形化妝鏡，探下J個鼻睇下有無呼吸，塊鏡有霞氣，顯示J仲有呼吸！」「我仲未反應得切，T就戴住手術用嘅手套，行落樓梯，手上攞住針筒，我見到針筒裡面有淺黃色透明液體，T話係酒精……而KK就再次壓係J嘅上身，同時，T係J嘅腳眼內側位置注射酒精！我留意到T打咗兩針係J嘅腳眼內側位，打咗三針係腰以下嘅其他地方……呢一刻……我呆咗！」
這時，警員問阿豪，為何發生此事？阿豪說：「其實3月4號晚凌晨，T話J當日中午會上嚟借錢，T話J屋企有錢，隻錶又賣到錢，又可以用J嘅信用咭買嘢套現……T又話知道J提款咭嘅密碼，話J戶口有八位數字，所以T提議，約J去觀塘海濱長廊老笠J，搶佢身上嘅財物……但海濱長廊太多閉路電視，放棄咗……我淨係有份去觀塘，我當時話唔得、唔可行，唔好咁做……之後我哋就搭的士番DAN6，途中我瞓著咗，唔知T同KK係車度講過啲乜……到咗朝早大約十點，就見T買咗哥羅芳番嚟……」
知道出事了，J死了，怎麼辦？阿豪稱：「T同KK氹我，話大家坐埋同一條船，有咩事比警察查起上嚟，唔會一齊死咩……果刻我驚，我無殺J，我亦無協助殺J，我真係驚，所以我聽咗佢地講……」「我哋三個人拉咗J入廁所，我唔肯定J係咪死咗，因為打針前仲有呼吸，打針後亦有斷斷續續嘅扯蝦聲……」
阿豪又稱：「T提意將J放血，就係開放式廚房攞咗一把啡黃色柄嘅刀仔，係J嘅左腳腳瓜位置𠝹咗刀，但J並無流血……」這時KK說：「不如埋咗佢(J屍體)！」阿豪：「不如放佢(J屍體)落海！」最後，T與KK認為埋掉屍體比較好，就決定埋屍！
阿豪稱：「T話買個衣櫃番黎，放條屍落去，用石屎封咗佢！」「跟住我就同T去五金鋪買英泥，因為無石灰粉，我哋買咗四包沙、兩包英泥或四包英泥、兩包沙(阿豪記不起正確組合)，係T比錢，仲比咗一百蚊做按金租手推車，因為泥沙實在太重……我推材料番去DAN6……」阿豪說到這裡，突然對警員說：「我睇下中間有無漏先…………(過了約十秒)岩！係咁！」
回到DAN6，阿豪稱：「我太累，唔舒服，瞓咗係梳化後面張床褥(單人)，當時大概下午三時半至六時半……期間，T將J嘅手提袋，放係我隔離，叫我好好看管！之後T與KK就決定出去買衣櫃，我就瞓咗覺……」「大概兩個半鐘至四個鐘後，T同KK番到單位，連同幾塊木板，要自己將木板釘成木箱，我唔知道佢哋係邊度買……」
另外，豪稱：「我被T吩咐將J果隻Omega錶，唸辦法賣咗佢，T叫我打比朋友，話執到隻錶，叫朋友幫手放(賣)錶……呢一段時間嘅所有行為，我仲好驚恐……」「我約咗朋友夜晚十點去銅鑼灣見面，比隻錶朋友，佢話無咁快知結果(價格多少)，跟住我就番DAN6，唔記得咗搭咩交通工具……後來亦無收到賣錶嘅錢……」
作供中……阿豪說到這個時候，突然停頓，稱：「阿Sir，對唔住，我漏咗part好重要嘅未講！」
「我攞隻錶去銅鑼灣之前，係單位裡面，見到J已經僵硬咗，無呼吸，T幫J把脈，無脈搏……T用膠袋笠住阿J個頭，佢話好忌望到死人嘅眼……最底層笠咗個紅色背心袋，第二層……嗯……嗯……(想了十秒)笠咗個黑色袋，第三層都係黑色膠袋！」「我同T就將J個頭連埋雙手一齊用尼龍繩定麻繩綁住，我負責用繩圍住，T負責打結。腳係我用尼龍繩定麻繩綁嘅，好花工夫，因為僵硬咗，唔能夠完全向心口方向屈曲……」
「綁好屍體後，三人將屍體拖出廁所，我拉住J皮帶扣嘅位置，T托住J個頭，KK托住J對腳，運送番客廳途中，T突然跣手，J嘅後腦撞落地下……」
「T同KK已經整好咗個木箱，放咗係客廳中間，我哋三個人合力，將阿J打側放入箱裡面，但唔記得咗係左邊身向上，定右邊身向上……然後我就出咗銅鑼灣！」
阿豪補充完漏說的話後，就開始說由銅鑼灣回到DAN6單位後的事情……
阿豪：「番到DAN6，T同KK瞓咗覺，我見到個木箱大概注入左五分二水泥，未完全凝固，仲係流質，當時仲見到J個身一半以上……」「我睇到呢個場面，就叫醒T，問T想點……我話一個星期前買咗機票去新加坡，同朋友一齊參加跳舞比賽，陣間(3月5日)凌晨四點半要去到機場……跟住T答我，咁等你番到嚟香港先再算啦！無辦法！」兩人對話完結，阿豪便收拾行李，準備出發……
阿豪：「呢個時候，T係J個手提袋度搵到J嘅門匙、住址證明同Omega手錶證書……」T大聲說：「啊……呢個仆街咁L醒嘅？開個暗格係個袋度，攪到我差啲搵唔到……」「T話條門匙係屬於住址證明顯示果個地方，話J有大概一千萬現金係屋企個夾萬裡面，得閒上去攞……」
之後，大約3月5日凌晨一時許，阿豪約了朋友來DAN6附近拿Omega證書，還請朋友吃麥當勞套餐，又將的士費用交給朋友。阿豪又買了三個黑椒脆脆漢堡套餐回DAN6單位，與T、KK、小草一同吃……之後，他便出發去新加坡……
錄影會面播到這裡，已是下午五時，超時了，要散庭了……真是依依不捨……
明天下午開庭將會續播阿豪錄影會面，究竟阿豪回港後發生甚麼事？下篇文章一一拆解……
(2891)
