石棺藏屍案(十六)

石棺藏屍案(十六)

《點解要將我隔離……》
案情撮要：2016年3月4日至3月29日期間，於荃灣灰窰角街DAN6商業大廈，本案被告曾祥欣(T)、劉錫豪(阿豪)、張善恒(KK)涉嫌謀殺男子張萬里(J)。行兇後以木板製成巨型箱子，放入屍體，再用水泥填封整個箱子，形成石棺。

三名被告企圖將石棺運到偏僻地埋掉或掉進海裡，可惜石棺過重，超出電梯負載量，需折返單位……三人欲鑿開石棺取出屍體方便棄屍，始終失敗，於是把石棺留在單位內，決定帶同知情女子何菱瑜(小草)逃走到台灣……

今天繼續審理石棺案，庭上繼續播放第二被告(阿豪)的警署錄影會面，大概是阿豪補充口供內容、阿豪確認搜證相片(公眾人士看不到的)，然後解釋物件是甚麼？是誰的？何時購買？當時有什麼用途等……阿豪看了超過二百張搜證相片，每張相片上均要簽字，證明閱過和了解內容……現在，說說阿豪有甚麼補充口供(請先看第十五集)……

有關2016年3月4日的事情。阿豪：「J(死者)上嚟DAN6單位，我以為好似T(第一被告)咁講，J上嚟借錢……當時我無戴眼鏡，睇唔到J同KK(第三被告)當時睇緊咩文件。」警員問阿豪，有否找來看？是甚麼文件？阿豪回應：「當時太驚，已經唔知點算，發生咁嘅事……」

有關哥羅芳。阿豪：「T將買番嚟果樽哥羅芳，比我睇完之後，佢同我講放咗係閣樓電視附近，又叫我到時要知點做，以為我會幫手(焗暈J)，當時我無比反應T，果刻我好累好眼瞓，我敷衍了事。」「當時係閣樓，T叫我試嗅哥羅芳果陣，小草(何菱瑜)瞓咗係床褥度，面向牆，我唔知佢係清醒，定玩緊手機。」

有關針筒。警員問：「點解屋企有咁多針筒？」阿豪回答：「T收埋好多騎呢嘢，係佢嘅癖好！」

有關死者J在案發後的情況。阿豪：「我當時想拍醒J，嗌佢，搣佢，我唔想做傷害到佢身體嘅行為，所以就用呢啲小方法令佢醒。」另外，阿豪又說：「我哋唸住鑿開石屎，攞番條屍出嚟，然後將佢入落行李喼，方便拎出去埋屍，但鑿開大量石屎只見到J嘅大半個人，卡住咗係石屎度，已經開始腐爛，見唔到有完整嘅皮膚。」

有關石棺的製造。阿豪：「當晚我出去銅鑼灣之前，見到T同KK用一個膠箱溝緊水泥，佢哋戴住紅色邊或綠色邊嘅白色勞工手套，無用工具，直接用手溝水泥(徒手)，呢部份我無參與過。」「啊……我唔記得咗講，好重要，我同T曾經出去買綠色油漆，T同KK負責油石棺外圍，初頭T話唸住將石棺油成綠色，就似打War Game(野戰遊戲)嘅障礙物，等運送嘅機司唔會懷疑……但個人認為無乜作用。」

有關案發後的其他事情。阿豪：「我哋將有關案發嘅物品掉入紙皮箱，然後我拎去樓上或樓下嘅後樓梯垃圾筒掉咗去，而KK就拎落停車場嘅大型垃圾筒掉咗去。」另外，阿豪又說：「T曾經買鏹水倒落DAN6單位地下，用嚟起油漬、污漬同灰泥漬，鏹水倒落地之後會揮發，然後間屋會無咁臭。」

有關案發後，阿豪為何不報警。阿豪：「曾經有唸過，但唔敢，理由非常之長篇……佢哋威脅我，眼神當然好兇狠啦，好惡咁指住我講，叫我去到新加坡，唔好唸住一走了之，叫我記得番嚟DAN6單位幫手……佢哋都擔心嘅，始終我係去旅行，驚我趁機會走咗去……」

有關DAN6單位。探員問：「閣樓塊玻璃牆，望唔望到地下客廳？」阿豪：「原本塊大玻璃係望到樓下，後來T貼咗層磨沙貼，就好矇，望唔到樓下，即使上面有人，將塊面貼住玻璃望落客廳，只係會望到人影，完全唔清楚。」

有關阿豪的個人資料。阿豪：「我花名叫豪仔、Keith、毫子，但呢單案嘅人唔知我叫毫子，之前係尖沙咀利時商場斜對面一間店鋪任職售貨員，賣番學背囊，2015年12月辭職。之後，間中去貨櫃碼頭同機場抄散(即做散工)，每日人工500至600蚊，即日出糧。有時會做舞蹈員表現job，大概800至1200蚊一個job。係DAN6單位住，曾經比過12000蚊阿T(每月4000元)，佢通常都會請食飯。平時除咗搭車、飲嘢(酒)外，唔會太大開支，搞掂食飯果part都唔會太大問題。2016年3月近案發期間，阿豪沒有積蓄，也沒有欠債。」

有關阿豪對案件主要人物的認識。阿豪：「我同T識咗6至7年，T嘅目測高度為158至163厘米，瘦身材，精壯，有肌肉，曾經將頭髮先後染成紫色、金色……」「我同KK係2015年10月31號相識，目測高度為177厘米，大隻、大力、魁梧，係台灣果時曾剃光頭，身上無紋身。」「至於小草，大約18至19歲，目測高度為164至166厘米，頭髮長至屁股位，啡頭髮，胸平，屁股平，唔健康身型。」「有關J，目測高度為170至175厘米，少少肥，有個大肚腩。有次T叫J去觀塘APM商場嘅星巴克飲嘢，我一齊去，當時識咗J，見過十次都唔知有無，曾經有J嘅電話號碼，大約一年前有打過電話比佢，係T叫我打，接通後比T講，我都唔知咩事！」至於阿豪，形容自己高度為183厘米。

有關逃走到台灣後的事情。阿豪：「我哋先後係松山同西門町住過旅館，後來去板橋區就租到間屋住。間出租屋係台灣一個朋友(逃到台灣後才認識)幫手簽名租嘅，朋友叫小蕊，係紋身店嘅推銷員，因為大家傾得投契，就問佢有冇辦法租屋，佢話如果我哋比錢租嘅話，佢唔介意幫手簽名租屋。而租金方面，我、T、KK都有夾錢比租金。」

警員問阿豪，在台灣，各人有否提起DAN6事件？阿豪：「如果大家留意到新聞，我哋就會係屋裡面傾起，例如傳媒報導錯我哋曾去過嘅地方，我哋就會話，都無去過果度……」「又會講當時發生DAN6件事後，唔應該咁處理(做石棺)！」

阿豪補充：「當知道香港警方揭發咗DAN6事件，搵到石棺，T話自己識得香港警隊高層，個高層會同阿T匯報案件進展……又話香港警察搵過屋企人，仲同KK講，你阿媽就嚟痴線……」

警員問阿豪，這個階段有沒有東西想補充？阿豪沉默、認真地說了番話：「係台灣發生嘅事，我係4月11號下晝一點，比人拉咗(台灣警方拘捕)，拉咗我之後就有台灣警察陪住我，到咗下晝四點幾，就送咗我去移民署……當時我見到T同KK戴住口罩，佢哋可以坐埋一齊傾計，拘留係同一間房超過廿四小時。而我就聽到職員話要將我隔離……我問台灣職員點解？起初對方支吾以對，後來答我係上級安排，又話T同KK間房已經爆滿，但我仲見到有人入嚟，會派去佢地間房……」「我唔知佢兩個講過乜，呢個行為令我好懷疑，我嘅感覺唔咪太好，呢個係公平性嘅問題，明明新聞都話曾祥欣先係主犯，因為DAN6單位係佢租嘅，點解要將我隔離……」

下星期一早上十時，繼續播放阿豪警署錄影會面……待續……

(2299)